По повеќе од половина век пауза, Mercedes-Benz повторно ја освои престижната титула „Европски автомобил на годината“. Новиот Mercedes CLA беше прогласен за најдобар автомобил за 2026 година, а признанието беше врачено на саемот за автомобили во Брисел.
CLA убедливо триумфираше со вкупно 320 поени, добиени од гласањето на 59 автомобилски новинари од 23 европски земји, оставајќи го второпласираниот модел, Skoda Elroq, на дури 100 поени зад себе. Третата позиција ја освои Kia EV4 со 208 поени.
Во поширокиот избор следуваа Citroën C5 Aircross на четвртото место со 207 поени, Fiat Grande Panda со 200, Dacia Bigster со 170 и новиот Renault 4, кој го заокружи списокот со 150 поени.
Според организаторите на изборот, Mercedes CLA бил најчесто рангиран на првото место од страна на жирито, што било клучно за неговата убедлива победа. Интересно е што Citroën C5 Aircross бил фаворит кај 15 медиуми, но тоа не било доволно за највисокото признание.
Оваа награда има особено значење за Mercedes, бидејќи брендот последен пат ја освоил титулата уште во 1974 година, со моделот 450 SE/SEL. Така, CLA го прекинува еден од најдолгите периоди без победа за германскиот производител во историјата на овој избор.
Минатогодишни добитници на наградата беа Renault 5 и Alpine A290, кои ја поделија титулата за 2025 година.
