Во изминатите десет дена беа склучени неколку договори за јавни набавки со високи вредности, во кои предничи Министерството за внатрешни работи.
Најголемиот договор, вреден 239 милиони денари (околу 3,9 милиони евра), МВР го склучи со компанијата „Еуроимпекс“ за набавка на возила. Веднаш зад него следува Општина Штип, која со фирмата „Дади Оил“ од Виница договори набавка на екстра лесно масло за домаќинство за потребите на училиштата и градинките во општината, во износ од 126,3 милиони денари (околу 2,05 милиони евра).
ЈП „Исар“ Штип и Министерството за социјална политика, демографија и млади склучија два договора со иста вредност – по 47,2 милиони денари (околу 767 илјади евра) за набавка на електрична енергија. Општина Ѓорче Петров пак, со фирмата „Пирамид билдинг солушнс“ обезбеди средства во висина од 40 милиони денари (околу 651 илјада евра) за реконструкција на улици во Волково, Ново Село и Кисела Јабука.
Меѓу повисоките договори се издвојува и оној на Министерството за социјална политика со „Праеториан“ за обезбедување на имот и лица, вреден 29,5 милиони денари (480 илјади евра), како и реконструкцијата на локалниот пат од Чифлик до Добарце, договорена од Општина Желино со „Пелагонија“ од Гостивар, во износ од 18 милиони денари (293 илјади евра).
На листата на најголеми договори се најдоа и Општина Чаир со ангажирање на приватна агенција за привремени вработувања (17,7 милиони денари), Општина Гевгелија за одржување на улично осветлување (17,5 милиони денари), како и Град Скопје, кој со „Геофото Зенит инженеринг“ склучи договор за геодетски услуги вреден 16 милиони денари (260 илјади евра).
