Министерот за дигитална трансформација, Стефан Андоновски, денеска изврши увид во реконструкцијата на новиот Центар за услуги во Делчево и истакна дека Министерството останува посветено да ги приближи електронските услуги до сите граѓани, особено до оние без дигитални вештини или пристап до интернет.
„Нашата цел е секој граѓанин лесно да пристапи до услугите на порталот на Министерството. Центарот во Делчево ќе биде место каде граѓаните ќе добијат поддршка и знаење како да ги користат потребните услуги“, изјави Андоновски.
Отворањето на Центарот се очекува во септември, а во него ќе бидат достапни повеќе од 300 услуги, меѓу кои уверение за државјанство, имотен лист, потврда за стаж од Пензискиот фонд, услуги од Агенцијата за вработување и други услуги од државните институции.
Министерот посочи дека бројот на услуги на порталот пораснал од 200 на над 300, а интересот на граѓаните за дигитализација се зголемил значително – од 1.000 на 7.400 корисници месечно.
И покрај предизвиците поврзани со дигиталната писменост и подготвеноста на институциите, соработката со клучните институции дава позитивни резултати. Покрај Делчево, Министерството планира отворање на слични центри и во Свети Николе, Крушево и Неготино.
