Министерството за финансии денеска ја префрли петтата транша од унгарскиот заем наменет за домашните компании, во износ од 700,9 милиони денари (11,3 милиони евра), информира министерката Гордана Димитриеска-Кочоска.
Вкупно се префрлени пет транши во износ од 171,1 милиони евра, обезбедени преку заем од 500 милиони евра од унгарската Експорт-импорт банка. Средствата се наменети за кредитирање на приватниот сектор преку Развојната банка и комерцијалните банки.
Компаниите можат да користат кредити со рок на отплата до 15 години, грејс период од три години и каматна стапка од 1,95%. Максималниот кредит изнесува до 10 милиони евра во денарска противвредност.
Од вкупниот заем, 250 милиони евра се наменети за поддршка на компаниите, додека останатите 250 милиони евра ќе бидат искористени за инфраструктурни проекти и проекти на општините.
