Њујорк, 3 август 2024 (МИА) – Според податоците на Меѓународниот монетарен фонд (ММФ), глобалната економија е во постојан раст. Се очекува глобалниот бруто домашен производ (БДП) оваа година да се зголеми за 3,2 проценти, а следната година да порасне за 3,3 проценти.
Азиските економии во развој се главни двигатели на глобалниот економски раст. Минатата година растот на индиската економија изнесуваше 8,2 проценти, додека кинеската економија порасна за 5,2 проценти. Во овие две земји е постигнат половина од вкупниот глобален раст. Меѓутоа, можно е овој тренд да не продолжи, особено кога станува збор за Кина.
Според последните податоци на ММФ, се очекува дека кинескиот раст ќе ослабне во следните пет години, односно дека до 2029 година ќе се намали на 3,3 проценти. Од друга страна, американскиот раст од 2,6 проценти оваа година се очекува да остане релативно стабилен, со проекција дека следната година ќе биде малку помал, односно 1,9 проценти.
Стапките на раст меѓу развиените земји стануваат сè поизедначени, а во ММФ го наведуваат намалувањето на јазот во производството меѓу овие земји како главен фактор.
Според проценката на британскиот весник „Економист“, глобалниот раст во следните пет години ќе биде воден од технолошката трансформација, развојот на вештачката интелигенција и енергетската транзиција.
Од Сања Костовска Извор МИА
