На денешен ден 1949 година во Скопје е основан Државниот ансамбл на народни игри и песни на Народна Република Македонија, од 1953 година именуван како „Танец“.
Ансамблот е формиран со одредбата на македонската влада за основање на Државниот ансамбл за народни игри и песни на Народна Република Македонија. Одредбата била издадена на 3 март 1949, а била објавена во „Службен весник на Македонија“ на 4 април 1949 година.
Според член 2, Ансамблот за народни игри и песни ги има следните задолженија:
- Да ги одржува, развива и негува уметничките вредности на народните игри
- Да ги одржува, обработува и развива народните песни
- Да гради програм со фолклорни народни танци и песни и на уметнички начин јавно да ги презентира
Ансамблот има настапено на над 4.500 концерти, фестивали и други културни приредби, со над осум милиони посетители. За успешноста на „Танец“ зборуваат големиот број награди, дипломи, благодарници и признанија добивани по разни поводи, концерти и сл., меѓу кои и наградите: „11 Октомври“, „Климент Охридски“, „13 Ноември“ и Орденот за заслуги, доделен од Претседателот на Република Македонија.
Репертоарот на „Танец“ го сочинуваат голем број народни ора, песни и обичаи од повеќе краишта на Македонија меѓу кои и: „Тешкото“, „Невестинско“, „Комитско“, „Чифте“, „Калајџиско“, „Тресеница“, „Осоговка“, „Драчевка“ и други.
Од поистакнатите уметници кои работеле со ансамблот Танец се издвојуваат: Александар Сариевски, Пеце Атанасовски, Васка Илиева, Трајко Прокопиев, Живко Фирфов, Никола Бадев, Виолета Томовска и многу други.
