Експерти од Меѓународната агенција за атомска енергија (МААЕ) пријавиле дека утрово забележале чад и слушнале експлозии во близина на украинската нуклеарна централа Запорожје, најголемата таква постројка во Европа. Според сведочењата на вработените во централата, нападот бил насочен кон помошна инфраструктура сместена на околу 1.200 метри од главните реактори, пренесува украинскиот медиум „Киев Индепендент“.
Нападот, кој вклучувал употреба на беспилотни летала и гранатирање, започнал околу 9 часот наутро. Главниот директор на МААЕ, Рафаел Маријано Гроси, потврди дека звуци од воена активност се слушале од позицијата на која биле стационирани нивните експерти, а густ чад се издигал од погодената област во текот на целото утро.
Нуклеарната централа Запорожје се наоѓа под руска контрола од март 2022 година, а денешниот напад е уште една во низата безбедносни закани што ја загрозуваат стабилноста на објектот и ја поттикнуваат загриженоста на меѓународната заедница.
Истовремено, рускиот град Сочи утринава се соочува со голем пожар во магацин за нафта, предизвикан од украински дрон, потврди регионалниот гувернер Венјамин Кондратјев преку Телеграм. Според првичните информации, над 120 пожарникари се ангажирани во гаснењето на пожарот. Инцидентот се случува во време на зголемени тензии и размена на напади помеѓу двете страни на конфликтот.
