Еден натпис поставен во продавниците на Spar во Хрватска предизвика бран реакции и жестоки дискусии на социјалните мрежи, особено на Reddit, каде граѓаните сè почесто јавно го искажуваат незадоволството од високите цени и условите во малопродажбата.
Во пораката, Spar наведува дека „се бори против инфлацијата“ и дека не прифаќа неоправдани зголемувања на цените од страна на добавувачите, поради што дел од производите биле повлечени од полиците. Наместо поддршка, ваквата порака кај дел од јавноста предизвика скепса и гнев.
На Reddit, реакциите беа бурни. Дел од корисниците отворено се сомневаат во искреноста на ваквите тврдења, посочувајќи дека ваквиот потег повеќе наликува на маркетиншка стратегија, отколку на вистинска борба против поскапувањата.
„Кој навистина верува во овие приказни?“, напиша еден корисник, додека друг коментираше дека проблемот можеби не е во добавувачите, туку во очекуваната маржа на трговецот.
Имаше и мислења дека ваквите пораки се популистички, со цел да се префрли вината за високите цени врз други актери во синџирот.
Сепак, не сите реакции беа негативни. Дел од граѓаните ја поздравија одлуката на Spar, истакнувајќи дека нивните производи под сопствена марка нудат прифатлив сооднос меѓу цена и квалитет.
Но и овие коментари често беа проследени со забелешки дека вистинските проблеми во малопродажбата не се само цените, туку и условите за работа.
Во дискусијата повторно се отвори и прашањето за ниските плати и прекувремената работа во трговските синџири. Еден коментатор саркастично напиша дека ќе поверува во ваквите пораки „кога вработените ќе добијат плати повисоки од минималната и кога прекувремената работа ќе се плаќа како што треба“.
Целиот случај ја отсликува пошироката слика во Хрватска, каде граѓаните се соочуваат со континуирани поскапувања, притисок врз животниот стандард и недоверба кон големите трговски системи.
Дали ваквите потези навистина придонесуваат за намалување на инфлацијата или станува збор за добро осмислена порака за јавноста – останува да се види.
