И покрај долгогодишната дебата за воведување општо ограничување на брзината на германските автопати, најновата студија покажува дека таа дискусија можеби е излишна. Според извештајот на Auto Bild, најголемиот дел од возачите и онака веќе возат со темпо што е под границата од 130 km/h, иако на многу делници нема законски ограничувања.
Истражувањето спроведено од Институтот за германска економија (IW) во покраината Северна Рајна-Вестфалија покажува дека просечната брзина на автопатите без ограничување изнесува само 113,5 km/h. Импресивен е податокот дека дури 83% од возачите доброволно возат под препорачаната брзина од 130 km/h.
Студијата е спроведена во лето 2024 година, при идеални временски услови – без дожд, снег или мраз. Според резултатите, само 1% од возилата се движеле со повеќе од 160 km/h. Дури и за време на викенди кога сообраќајот е поредок, најголемиот број возачи се држат во опсегот меѓу 100 и 130 km/h.
Овие наоди отвораат прашање дали е навистина неопходно воведување на законско ограничување, кога реалната состојба на теренот покажува дека возачите веќе се придржуваат до умерено темпо.
Според експертите, ваквото однесување е резултат на неколку фактори: честите градежни работи на автопатите, зголемената фреквенција на сообраќај поради враќањето на луѓето во канцелариите, како и растечките цени на горивото, што ги охрабрува возачите на поштедлив стил на возење.
Трендот е очигледен – просечната брзина на германските автопати се намалува. Затоа, научниците што ја спровеле студијата сметаат дека „вечната расправа“ за ограничувањето е претерана. Сепак, тие се согласуваат во едно: доколку сите возачи би се придржувале до порамномерно темпо на возење, сообраќајот би бил поефикасен, а потрошувачката на гориво значително пониска поради помалку ненадејни забавувања и кочења.
