Skopje City Mall и оваа година организира новогодишен Базар на рачно изработени уникатни творби, кој премина во традиција. Овогодинешниот Базар на кој учество ќе земат вкупно 68 индивидуалци – ракотворци, е најголем досега, а учесниците се поделени во групи, односно во три етапи на земање учество.
Во првата група, од 15 – 20 декември, учество земаат 22 претставници. Тие веќе од неделата ги имаат изложено своите производи на штандовите на првиот кат во молот, со што веќе започна новогодишната магија.
Меѓу разните мали подароци со новогодишни мотиви, рачно изработени марами, уметнички слики и многу други производи, блеска штандот на двете штипјанки, кои годинава за првпат учествуваат на овој Базар, со своите уникатни производи изработени од бетон претставени со брендот Beton Pots.
Природен бетон – претворен во уметност!
Дека дури и од бетонот може да се направи уметност, односно декоративни украси, вазни, свеќници, саксии, свеќи и многу други мали нешта кои го разубавуваат секој дом, покажуваат токму Наташа Стефановска и Даница Филипова од Штип.
Овие две млади жени започнале да ги прават овие прекрасни и уникатни бетонски уметнички творби пред неколку години во мал простор во Штип, кој подоцна премина во нивно Ателје, кадешто постојано имаат изложено различни производи.
„Инспирација за оваа работа добив од цвеќето „Сукулента“, идејата ми беше дека треба да бидат засадени во мали саксии, односно да изгледаат минималистички и сама почнав да правам саксии од бетон, со тоа што тогаш немавме ни калапи. Подоцна со Даница истражувавме и почнавме да набавуваме материјали и надвор од Македонија. На почетокот правевме само саксии за цвеќиња, а со текот на времето почнавме да правиме и разни декоративни украси, вазни, свеќници и слично“ вели Стефановска и додава:
„Сукулентата не’ донесе до се’ ова што го правиме денес, бидејќи тоа е природно цвеќе, ние не користиме обичен цемент, туку природен, кој не е штетен за околината, така што сукулентата си најде и природно место за живеење“.
За овој Базар, овие две креативки се подготвувале месец и половина. Годинава учествуваат првпат, а минатата година своите уметнички творби ги изложија во штипскиот City Mall.
Освен на вакви настани, своите производи ги изложуваат online, односно преку нивните официјални профили на Facebook и Instagram, од кадешто заинтересираните можат да си нарачат некое убаво деталче кое ќе им го разубави домот, или пак да подарат на некоја драга личност.
„Во иднина би сакале да имаме свое Уметничко студио (Craft studio), кадешто би се одржувале работилници и би се ширеле со нови креативци и ентузијасти. А би било уште поубаво кога на некој начин ова студио би било споено со некое кафуле, кадешто би се дружеле младите и би ги споделувале своите креативни идеи“, потенцира Филиповска.
Традиционалниот новогодишен Базар, ќе трае до крајот на месецот.
Повеќе фотографии од Beton Pots можете да погледнете во продолжение:
