Во изминатите десет дена се склучени договори од стотици милиони денари преку системот за јавни набавки, при што најголем дел од средствата завршуваат кај телекомуникациски, енергетски и ИТ-компании.
Според објавените податоци, Министерство за внатрешни работи склучило два одделни договори со Македонски Телеком за телекомуникациски услуги, во вкупна вредност од над 500 милиони денари, односно повеќе од 8 милиони евра. Договорите се склучени на крајот на 2025 година, а објавени на 13 јануари 2026 година.
Големи суми се издвоени и во енергетскиот сектор. ЕСМ има склучено неколку високо-вредни договори за потребите на РЕК Битола, меѓу кои и набавки на гумени транспортни ленти со челични сајли и платно, со вкупна вредност од над 247 милиони денари. Дел од договорите се склучени уште во 2023 година, но се објавени дури во јануари 2026 година.
Во листата на најголеми договори се најде и ЕВН Македонија, која склучила договор за набавка на стандардни мерни ормари во износ од над 173 милиони денари, како и ЈЗУ ГОБ 8-ми Септември, која склучила договор за снабдување со електрична енергија во вредност од 70,8 милиони денари.
Значајни средства се насочени и кон ИТ-секторот. Министерство за здравство склучило договор вреден над 37 милиони денари за хардверска опрема за системот „Мој Термин“, додека ЈП Паркинзи на Општина Центар има склучено договор за софтверско одржување на интегриран систем.
Меѓу договорите се најдоа и набавки за обезбедување, санација на силоси, како и услуги за обезбедување на имот и лица, што уште еднаш покажува дека јавните набавки остануваат клучен канал за распределба на јавните пари, со значително влијание врз пазарот.
