Обвинетите во случајот „Геријатрија“ денеска пред Основниот кривичен суд во Скопје изјавија дека не се чувствуваат виновни за делата што им се ставаат на товар. Мухсин Арифи, директор на ЈЗУ Специјализирана болница за геријатриска и палијативна медицина, се соочува со обвинение за примање поткуп, додека Блерим Амити е обвинет за противзаконито влијание.
Според обвинителниот акт, Арифи побарал 20.000 евра за да овозможи прием на пациентка во тешка здравствена состојба. Амити, кој претходно го познавал сведокот, се понудил да посредува и ја примил паричната сума, при што бил фатен на местото на делото од полицијата. Обвинителката Искра Хаџи Василева во воведните зборови истакна дека овој случај е пример за длабоко вкоренета корупција во општеството.
„Пропорциите и интензитетот на корупцијата се толку длабоки што нѐ потсетуваат дека ја засегаат секоја сфера од нашето живеење“, рече таа, додавајќи дека станува збор за грубо барање мито од страна на директорот. Хаџи Василева нагласи дека обвинетите дејствувале со цел лично богатење, искористувајќи ја ранливоста на пациентката и нејзината потреба за итна медицинска помош.
Таа истакна дека сведокот, кој е давател на доживотна издршка на пациентката, го пријавил случајот, а доказите кои ќе бидат презентирани пред судот јасно ги документираат коруптивните дејствија. Одбраната на обвинетите најави дека ќе презентира докази во вид на статут, процедури и законски одредби кои произлегуваат од институцијата што ја застапувал Арифи. Според нив, овие докази ќе отворат правни прашања со цел да се докаже дека обвинетите немале намера да извршат кривично дело.
„Доказите кои ќе бидат изнесени во понатамошниот тек од постапката, убедени сме, ќе упатат на недоразбирање во овој т.н. кривично правен настан“, изјави одбраната. Судскиот процес го водат судиите Ленка Давиткова и Илија Трпков, а следното рочиште е закажано за 16 септември во 13 часот.
