Со убедлива победа од 5:1 над тимот на ООУ „Братство“, основците од „Димо Хаџи Димов“ од Влае го крунисаа својот триумф и го освоија првото место во училишната фудбалска лига на Општина Карпош за учебната 2024/2025 година. Со вкупно 41 освоен поен, тие доминираа на табелата, оставајќи ги зад себе екипата на ООУ „Војдан Чернодрински“ со 37 поени и тимот на ООУ „Лазо Трповски“ кој го освои третото место со 36 поени.
На завршниот натпревар присуствуваше и градоначалникот на Општина Карпош, Стевчо Јакимовски, кој лично ги врачи наградите на најдобрите екипи и поединци. Тој упати честитки за фер-плеј духот и спортскиот ентузијазам на младите учесници, особено посочувајќи ја победата на екипата како симболично испраќање во пензија на нивниот наставник по физичко, Борче.
„Навистина ми е драго што нашите ученици ни покажаа како треба да се однесуваат спортистите, во поглед на фер плеј играта и пожртвуваноста на теренот. Денеска победи екипата на „Димо Хаџи Димов“ а учениците со тоа му приредија една голема награда на својот наставник по физичко воспитување, господинот Борче којшто заминува во пензија. Ова претставува едно прекрасно испраќање на својот драг наставник кој воедно и за мене е еден драг човек, бидејќи ние се познаваме одамна. Притоа, сите ученици коишто го освоија првото место во рамки на училишните спортски лиги во кошарка, фудбал и одбојка (девојчиња), како и основците кои во својата категорија се прогласени за најдобри спортисти, ќе бидат наградени на начин што Општина Карпош за нив обезбеди седумдневно летување во Грција. Јас на сите им посакувам успешно да ја завршат оваа учебна година и да се забавуваат што е можно повеќе на летниот одмор “ изјави Јакимовски.
Најдобрите спортисти ќе бидат наградени со седумдневно летување во детскиот камп „Каливас“ во Грција, обезбедено од Општина Карпош. Дополнително, четворицата најдобри фудбалери ќе добијат и еднократна парична награда од по 6.000 денари.
Награди поединечно освоија:
Најдобар голман: Петар Стојковски (ООУ „Лазо Трповски“)
Најдобар стрелец: Филип Андоновски (ООУ „Христијан Тодоровски Карпош“)
Најталентиран играч: Димитар Балиски (ООУ „Војдан Чернодрински“)
Најдобар играч за сезоната 2024/2025: Огнен Сивевски (ООУ „Димо Хаџи Димов“)
Овие резултати ја заокружуваат успешната сезона на училишните спортски лиги во Карпош, каде младите спортисти покажаа страст, дисциплина и спортски дух.
