Општина Карпош ги демантира тврдењата кои се дел од актуелната изборна кампања за градоначалник, а кои се шират како дел од црната кампања. Во соопштението од општината, властите ги повикуваат сите кандидати за градоначалници, кои потпишале Кодексот за фер и демократски избори, да се воздржат од пласирање на невистини и лаги, и наместо тоа, да ги претстават своите идеи и проекти пред граѓаните.
Особено внимание е посветено на едно од најновите тврдења, кое било изнесено преку партиски мегафони. Според него, лифтовите во новата општинска зграда чинат 600.000 евра, што според Општина Карпош е апсолутно неточно. Властите ја демантираа оваа информација, објаснувајќи дека ова е само обид за манипулација со јавноста и потценување на интелигенцијата на гласачите во Карпош.
„Во реалноста, изградбата и инсталирањето на два лифта во новата административна зграда на Општина Карпош, која има четири ката, чини точно 4 милиони денари (околу 65.000 евра). Ова вклучува комплетно изведување на лифтовите, вклучувајќи челична конструкција, арматури, електроника и останати потребни компоненти. Оваа сума е дел од поголем договор кој вклучува и други работи како што се: алуминиумска столарија, водоводни приклучоци, молерофарбарски работи и други градежни активности,“ се наведува во соопштението на Општина Карпош.
Со ова, од локалната власт се повикуваат сите кандидати да се придржуваат на принципите на фер и демократска кампања и да не ја злоупотребуваат довербата на граѓаните со дезинформации.
