Будимпешта, 12 мај 2025 (МИА) – Западната стратегија насочена кон уништување на Русија не успеа, санкциите не ја постигнаа својата цел, а Русија ја спречи Украина да се приклучи на НАТО, изјави денеска унгарскиот премиер Виктор Орбан.
-Никој не се осмелува да го признае тоа, но ја изгубивме оваа војна, рече тој и додаде дека руската економија не се распаднала.
Орбан, на состанокот на претседателите на парламентите на земјите-членки на Европската Унија и претседателот на Европскиот парламент во Будимпешта, рече дека и покрај ова, Европа сè уште ја продолжува војната и се однесува како победата да е можна.
Тој рече дека светот е во состојба на трансформација споредлива со раѓањето на националните држави и Вестфалскиот мир. Менталитетот на западниот свет се менува и Европејците мора да одговорат на овој процес, истакна Орбан, оценувајќи дека Европа е неподготвена.
-Како да сакавме да ги решиме проблемите од следната деценија со одговорите од претходната деценија, но старите вистини повеќе не функционираат, светот се промени, а ние, Европејците, не успеавме да го следиме тој пример, рече тој.
Орбан рече дека неколку европски земји сакаат да обезбедат дополнителна поддршка на Украина за да може да ја продолжи војната. Имаме различно мислење, според нас, колку подолго трае војната, толку повеќе животи ќе бидат изгубени, ситуацијата на бојното поле ќе биде полоша, нагласи тој.
Орбан рече дека предлогот на Европската комисија за принудно напуштање на руските енергетски извори поради војната едноставно ќе ја уништи унгарската економија. Замислете ако цената на енергијата за домаќинствата и бизнисите одеднаш се удвои. Унгарските семејства нема да можат да си го дозволат тоа, рече Орбан, додавајќи дека затоа Унгарците сакаат мир и сакаат што поскоро да бидат ослободени од политиката на економски санкции.
Унгарскиот премиер рече дека ЕУ никогаш не прифатила земја во војна, и тоа со добра причина. Покрај тоа, членството на Украина би претставувало економски товар што земјите-членки нема да можат да го поднесат, изјави Орбан.
-Ситуацијата е поинаква со Украина и ние би биле во проблеми. Лош договор. Аграрна криза, невработеност, задолженост, пад на животниот стандард, предупреди тој. Орбан рече дека денес Европа е богата и слаба, и дека ова е најопасната комбинација, и затоа Европа мора да се зајакне.
„Ние, како членови на националниот парламент, имаме должност да ја одиграме нашата улога и ние, Унгарците, сме подготвени да го сториме тоа. Да ја направиме Европа повторно голема“, заклучи Орбан.
Од Марија Спасовска Извор МИА
