Стокхолм, 9 мај 2025 (МИА) – Новиот советник за национална безбедност на Шведска, Тобијас Тјиберг, денеска поднесе оставка од таа функција, само еден ден по неговото именување, откако премиерот на Шведска Улф Кристерсон го критикуваше затоа што не открил информации за фотографии кои ги објавил пред неколку години на сајт за запознавање.
Владата соопшти дека Тјиберг, кој претходно беше амбасадор на Шведска во Украина и Авганистан, изоставил информации за време на безбедносните проверки.
Тјиберг за шведскиот дневен весник „Дагенс нихетер“ изјави дека станува збор за стари фотографии од профил кој порано го имал на сајтот за запознавање Гриндр и дека требало да ги информира надлежните за тоа за време на безбедносните проверки, но не го направил тоа.
Проверките за чувствителни државни функции обично бараат откривање на сите информации кои би можеле потенцијално да направат некој подложен на уцени.
Тјиберг требаше денеска да отпатува за Осло со Кристерсон на состанокот на северноевропските лидери, но неговото учество беше откажано.
Оставката на Тјиберг следува само неколку месеци откако неговиот претходник се повлече од функцијата поради обвинувања за несовесно постапување со доверливи податоци.
Од Сања Костовска Извор МИА
