Домашни и балкански музички ѕвезди, највкусната пита пастрмајлија, квалитетното македонско вино и гостопримливи домаќини годинава ќе ја одбележат најмасовната манифестација во градот „Фестивалот на велешка пита и вино“ што ќе се одржи на 10, 11 и 12 октомври. Нашата музичка дива Калиопи ќе настапи на првата фестивалска вечер, втората вечер е резервирана за балканската музичка ѕвезда Северина. Неповторливите Бајага и Инструктори со кои пораснаа многу генерации ќе ја одбележат третата и последна фестивалска вечер. Во рамки на богатата музичка понуда, на овогодинешната Питијада ќе настапат бројни музички групи, пејачи од забавната и народната естрада, а забава е предвидена и за најмладите наши сограѓани. И годинава вистинска атракција ќе биде џиновската пита која од година во година руши рекорди.
Освен што ќе вкусат пита пастрмајлија и вино, посетителите ќе можат да си купат уникатни предмети изработени од вештите раце на нашите ракотворци. Базарот со рачните изработки ќе биде лоциран на улицата Благој Ѓорев (кај влезот на Гимназијата).
Општина Велес ги поканува сите граѓани на Велес, но и од другите градови, да го посетат фестивалот на велешка пита и вино и да уживаат во прекрасниот амбиент на Питијада 2025.
Извор:veles.gov.mk
