Двегодишното дете кое беше тешко повредено за време на новогодишната ноќ и се наоѓаше во животозагрозувачка состојба, утринава почина во Клиничкиот центар „Мајка Тереза“ во Скопје.
Детето било донесено на Клиниката за интензивна нега околу 3 часот по полноќ, со тешка повреда на главата предизвикана од проектил од огнено оружје. И покрај итната медицинска интервенција и напорите на лекарските тимови, повредите се покажале како фатални, а смртта била констатирана утрово.
Според првичните информации, постои сомнеж дека станува збор за заскитан куршум, но околностите под кои дошло до трагедијата сè уште не се разјаснети. Надлежните институции работат на утврдување на точните причини, а се очекува Министерството за внатрешни работи да излезе со официјални информации за случајот.
Од Јавното обвинителство информираат дека е издадена наредба за обдукција на телото на починатото дете, со цел целосно да се расветлат причините за смртта и сите релевантни факти поврзани со настанот.
Случајот ја потресе јавноста и повторно го отвори прашањето за безбедноста и неодговорната употреба на огнено оружје, особено за време на празнични прослави.
