Во Белград почина Сенка Велетанлиќ, истакната пејачка и актерка и сопруга на Зафир Хаџиманов. Таа имаше 90 години.
Веста за нејзината смрт ја соопшти нејзиниот син, музичарот Васил Хаџиманов, кој на социјалните мрежи напиша дека неговата мајка починала по тешка болест, „тивко, достоинствено, во сон, како дама“.
Сенка Велетанлиќ е родена на 27 мај 1936 година во Загреб. Музичкиот пат го започнала во хорот на КУД „Јожа Влаховиќ“, а во 1958 година ги направила првите снимки за Радио Загреб. Иако дипломирала на Економскиот факултет, одлучила животот целосно да го посвети на музиката.
Пробивот го оствари во 1960 година, кога на фестивалот во Опатија ја изведе песната „Ноќ без ѕвезди“, по што стана една од најпрепознатливите ѕвезди на поранешната југословенска сцена. Во средината на 1960-тите се омажи за Зафир Хаџиманов, со кого оформи уметнички тандем што остави длабока трага во популарната култура.
Во 1967 година, Сенка и Зафир го одржаа својот прв рецитал во театарот Ателје 212 во Белград, а тогаш ТВ Белград за првпат сними концерт во живо со популарна музика. Нивниот дует „Љуби ме и главата горе“ прерасна во евергрин во Македонија и во поранешна Југославија. Во 1972 година Сенка сними дует и со својата сестра Бисера Велетанлиќ.
Покрај музиката, таа оствари и значајна актерска кариера, играјќи во десетина филмови и телевизиски серии. Особено се издвојува нејзината улога во филмот Три на Александар Петровиќ, еден од најзначајните остварувања на југословенскиот „црн бран“.
Со Зафир Хаџиманов, кој почина во 2021 година од последици на ковид-19, го имаат синот Васил Хаџиманов. Нивната внука, Марта Хаџиманов, е успешна оперска и џез пејачка, со што уметничката традиција на семејството продолжува.
