Скопје, 9 август 2024 (МИА) – Министерот за земјоделство, шумарство и водостопанство Цветан Трипуновски соопшти дека е постигнат договор за откупната цена на оризот. На денешната средба во неговиот Кабинет е договорено откупните цени за крупните сорти да изнесуваат 35 денари за рандман од 40 проценти, а за ситните сорти 30 денари за рандман од 40 проценти.
Како што наведува Трипуновски, овие цени ќе се зголемуваат колку што се зголемува рандманот.
Според министерот, две илјади тони арпа треба да се откупат во наредните 30 дена.
-Македонија треба да биде горда на македонскиот ориз, на работата на земјоделците на оризовите полиња, на маката и трудот треба да и дадеме убава иднина. Денеска се разговараше за квалитетот, производната цена и иднината на македонскиот ориз. Преку темелна дискусија се постигна договор преку кој, откупните цени за крупните сорти ориз ќе изнесуваат 35 денари за рандман од 40 проценти и за ситните сорти 30 денари за рандман од 40 проценти, со напомена дека ова се цени на кои колку рандманот се зголемува така и цената ќе биде зголемена. Пред неколку месеци на наша иницијатива успеавме да го внесеме оризот како стратешка култура во стоковите резерви. Kако што веќе потенциравме, оваа мерка претставува гаранција за нашите оризопроизводители, нагласува министерот.
На средбата присуствуваше и директорот на Државен инспекторат за земјоделство, Васе Анакиев.
Од Мирјана Чакарова/МИА
