Пекинг, 25 април 2025 (МИА) – Претставници на Кина, Русија и Иран денес се сретнаа со претставници на Меѓународната агенција за атомска енергија (МААЕ) за да разговараат за нуклеарната програма на Иран, јави Ксинхуа.
Средбата на трите земји со претставниците на МААЕ и генералниот директор на агенцијата следеше откако шефот на иранската дипломатија, Абас Аракчи, претходно неделава го посети Пекинг.
На состанокот се разговараше за суштинската улога на МААЕ во процесот на политичко и дипломатско решавање на прашањето за нуклеарната програма на Иран, при што Кина изрази поддршка за дијалогот на Иран со сите актери, вклучително и САД, соопшти кинеската агенција.
Шефот на руската дипломатија, Сергеј Лавров, претходно изјави дека Русија ја поздравува желбата на САД и Иран да постигнат договор за нуклеарната програма на Иран и е подготвена да го олесни процесот на преговори меѓу земјите, но преговорите мора да ги земат предвид легитимните интереси на Техеран.
Портпаролот на Кремљ, Дмитриј Песков, изјави дека дијалогот меѓу Иран, Русија и Кина за различни прашања, особено проблемот со нуклеарната програма на Иран, е неопходен за да се обезбеди стабилност во целиот регион на Блискиот Исток.
Шефот на иранската дипломатија претходно изјави дека директните разговори со САД за нуклеарниот договор во моментов не се можни поради санкциите и политиката на максимален притисок што ја води Вашингтон.
-Иран не е подготвен да преговара за своето право да збогатува ураниум, рече Абас Аракчи, додавајќи дека неговата земја е подготвена да изгради доверба во врска со евентуалната загриженост за иранското збогатување ураниум, но „за принципот на збогатување не може да се преговара“, рече Аракчи.
Од Сашко Димевски Извор МИА
