По повеќе од шест часа сослушување во Основниот суд Тетово, судијата во присуство на претставници од Центарот за социјална работа и јавниот обвинител донесе одлука за определување мерка притвор за малолетниот Л.М. од село Гајре. Тој се сомничи дека е соучесник во убиство извршено на 10 август во Тетово. Обвинителството побара притвор и за уште три лица вклучени во случајот.
„Издадена е наредба за спроведување истражна постапка против осомничените за убиство според член 123 од Кривичниот законик, за неовластено производство и поседување оружје и експлозиви, како и за тешки кривични дела против јавната безбедност. Едно дете, родено во 2010 година, се сомничи како соучесник во убиството, согласно Законот за правда за децата“, информираат од Јавното обвинителство.
Дополнително, наредба за истрага е издадена и за две лица осомничени за обид за убиство, како и за дела поврзани со нелегално оружје и експлозиви.
Според информациите, лицата за кои е издаден притвор се З.М. и М.Т., додека Р.Т., кој бил повреден за време на настанот, се наоѓа на лекување во Клиничката болница „Мајка Тереза“ во Скопје под полициски надзор.
Како што објави обвинителството, на 10 август на улицата „Благоја Тоска“ во Тетово, првоосомничениот и малолетното лице, заедно и со умисла, користејќи автоматска пушка – оружје што е забрането за цивили – испукале повеќе проектили кон возило марка „Голф“. Еден од куршумите го погодил возачот, кој починал на местото, додека совозачот бил погоден со два куршума во градниот кош и задобил тешки телесни повреди опасни по живот. Еден куршум погодил и дете родено во 2012 година, кое се наоѓало во близина на инцидентот.
По нападот, осомничените го напуштиле местото на настанот.
Обвинителството информира дека за сите осомничени лица, вклучително и малолетникот, е предложен притвор, а истражната постапка е во тек.
