Заменик министерот за економија и труд, Маријан Ристески, најави дека до крајот на годината ќе бидат изречени првите казни за компании кои не го почитуваат Законот за нефер трговски практики. Оваа изјава беше дадена денеска во Штип, каде Ристески нагласи дека во наредната година се планира зголемување на казнените одредби.
Во текот на минатата и оваа година, Министерството за економија презеде низа мерки, вклучувајќи ограничување на цените, со цел да се заштити животниот стандард на граѓаните. „Донесувањето на Законот за нефер трговски практики е клучно, а Комисијата за заштита од конкуренција активно реагира на пријавените неправилности, особено во маркетите“, изјави Ристески.
Тој истакна дека казните кои ќе бидат изречени во првата рунда се сметаат за мали, но во иднина се предвидува нивно значително зголемување. Пазарните инспектори во текот на годината изрекле казни во висина од околу два милиони евра, по спроведени 18.000 контроли на трговија на мало и големо.
„Воочени се многу неправилности, а казните изнесуваат околу 120 милиони денари. Ние продолжуваме да ја следиме ситуацијата со цените во сите маркети и ќе се стремиме кон стабилизација на инфлацијата на ниво од околу 3% во наредниот период“, заклучи Ристески.
