Рускиот претседател Владимир Путин денеска одржа прес-конференција по самитот со американскиот претседател Доналд Трамп, оценувајќи дека разговорите се одвивале во „конструктивна атмосфера на заемно почитување“.
– Имавме многу темелни преговори што беа доста корисни – изјави Путин, изразувајќи благодарност до Трамп за иницијативата за средбата во Алјаска.
Тој додаде дека избраната локација има симболично значење поради заедничката историја на Русија и САД во тој регион.
Односи на најниско ниво од Студената војна
Путин нагласи дека сегашните односи меѓу Русија и САД се на најниско ниво од времето на Студената војна, но додаде дека средбата покажала подготвеност за нови чекори.
Украина – централна тема на разговорите
Според рускиот претседател, конфликтот во Украина бил во фокусот на разговорите со Трамп.
– Русија е искрено заинтересирана за крај на конфликтот. Но, за мирот да биде траен, мора да се елиминираат примарните причини за конфликтот – рече Путин, алудирајќи на, како што тој ги нарече, „фундаментални закани за руската безбедност“.
Тој додаде дека се согласил со ставот на Трамп дека мора да се гарантира и безбедноста на Украина, и оцени дека договорот постигнат на самитот може да биде чекор напред кон мир.
– Се надевам дека договорот што го постигнавме ќе го отвори патот кон мир во Украина – порача рускиот претседател.
Критики кон европските лидери
Во завршниот дел од обраќањето, Путин упати критика до европските лидери, изразувајќи надеж дека тие нема да го „торпедираат почетниот напредок“ што, според него, е постигнат на самитот во Алјаска.
