Кинеските производители на автомобили бележат историски пробив на европскиот пазар – во првиот летен месец од годинава, продадени се над 65.000 возила од кинеско потекло, што претставува скок од речиси 50% во однос на јуни 2024 година.
Според најновите податоци на аналитичката куќа Dataforce, во јуни 2025 година европските потрошувачи купиле 65.110 кинески автомобили, обезбедувајќи им пазарен удел од 5,5%. Најуспешен бренд повторно е MG, со продадени 25.027 возила, пред BYD (14.968) и Chery (8.860).
Особено импресивни се резултатите во целото прво полугодие – од јануари до јуни, во Европа се продадени 327.712 автомобили произведени од кинески компании. Тоа е зголемување од 72% во споредба со истиот период лани, со што кинеските производители достигнаа пазарен удел од 4,8%.
MG останува лидер со 151.435 продадени единици – речиси половина од вкупната продажба на кинески брендови. Следуваат BYD со 69.953 и Chery со 38.402 возила.
Динамичниот раст укажува дека Европа станува сè поважно поле за кинеските автомобилски гиганти, кои сè посериозно конкурираат на традиционалните европски брендови. Судејќи според трендот, нивното влијание на пазарот допрва ќе се зголемува.
