Букурешт, 16 декември 2024 (МИА) – Од учебната 2025/2026 година, предметот „Историја на комунизмот во Романија“ ќе стане задолжителен за сите ученици во 12-то или 13-то одделение, објави Министерството за образование.
„Носталгијата за комунистичките времиња често се должи на непознавање на историските факти“, изјави министерката за образование Лиџија Дека, додавајќи дека предметот ќе им помогне на младите да стекнат подобро разбирање за демократските процеси.
Новата програма беше претставена на настан кој одбележа 35 години од Романската револуција од 1989 година.
Дека прецизираше дека оваа дисциплина ќе ја изучуваат сите средношколци во Романија. – Би додала дека сите ученици ќе се подложат на оваа дисциплина токму кога се приближува нивниот прв демократски глас, кога се приближува возраста, кога ќе станете зрела личност и ќе почнете да станувате активен граѓанин, вклучително и преку демократскиот гест на гласање, нагласи министерката.
Таа учествуваше на настанот насловен „35 години од романската револуција во 1989 година: Одобрување на наставната програма за историјата на комунизмот во Романија“ што се одржа на Филолошкиот факултет на Универзитетот во Букурешт.
Од Сања Костовска Извор МИА
