Во текот на овие денови и зимските месеци, кога честата појава на магла и намалена видливост значително ги отежнува условите за одвивање на сообраќајот, се зголемува и ризикот од настанување на сообраќајни незгоди. Намаленото видно поле, отежнатата проценка на растојанијата и побавната реакција на возачите се меѓу главните фактори што придонесуваат за потешки сообраќајни незгоди, вклучително и верижни судири со тешки последици.
Со цел унапредување на безбедноста на сите учесници во сообраќајот, апелираме и советуваме до возачите за строго почитување на следните препораки при возење во услови на магла и намалена видливост:
- Брзината на движење да биде прилагодена на видливоста, состојбата на патот и густината на сообраќајот, со можност за навремено и безбедно запирање.
- Да се одржува поголемо безбедно растојание помеѓу возилата, со цел навремена реакција при опасности на патот и ненадејни состојби.
- Да се користат соборени светла за осветлување на патот и светла за магла, доколку возилото ги поседува, а да се избегнува употребата на долги светла, кои дополнително ја намалуваат видливоста поради рефлексија од маглата.
- Во услови на густа магла, возачите да бидат видливи за останатите учесници, а доколку е потребно, да ги вклучат и трепкачите како дополнителна светлосна сигнализација.
- Да се избегнуваат ризични маневри, како што се престигнување, нагло запирање или паркирање на коловозот. Доколку запирањето е неопходно, тоа треба да се направи надвор од коловозот, со соодветна сигнализација – рефлектирачки елек, триаголник или жолто ротирачко светло.
- Возењето да се одвива поблиску до десниот раб на коловозот, со зголемено внимание на хоризонталната и вертикалната сигнализација.
Избегнувајте патување навечер и рано наутро кога маглта и намалената видливост се најизразени.
Посебен апел се упатува до младите и недеволно искусни возачи, кои треба да покажат дополнителна претпазливост и одговорност при управување со возилото во вакви временски услови.
Безбедноста во сообраќајот е заедничка одговорност. Со внимателно, совесно и дисциплинирано однесување, секој возач може да придонесе кон заштита на сопствениот живот, како и животите на останатите учесници во сообраќајот.
Извор:rsbsp.org.mk
