Соединетите Американски Држави сè повеќе се потпираат на увозот од Европската Унија, што покажува новата студија на германскиот економски институт IW. Според анализата, ЕУ ја надмина Кина по вкупна вредност на увозот и по број на производи, што укажува на значителна промена во трговските текови во последните 15 години.
Бројот на производни групи од кои најмалку 50 проценти од увозот доаѓаат од ЕУ се зголеми од околу 2.600 во 2010 година на над 3.100 во 2022 година. Оваа промена може да ја зајакне преговарачката позиција на Европската комисија, предводена од Урсула фон дер Лајен, во разговорите со Вашингтон за царините. Според податоците, вкупната вредност на производите увезени од ЕУ, вклучувајќи хемикалии, електрична опрема и машини, достигна 287 милијарди долари, што е речиси 2,5 пати повеќе отколку пред 12 години.
Во споредба, Кина минатата година опфати 2.925 групи производи со вкупна вредност од 247 милијарди долари. IW истакнува дека зависноста на САД од Кина значително се намалила, што се смета за дел од процесот на „деризикирање“. Производите од ЕУ, кои постојано имаат висок удел во американскиот увоз, тешко се заменуваат, што е важен аспект за Унијата во услови на можни трговски тензии.
Како последна опција, ЕУ би можела да размисли за ограничување на извозот на критични стоки за американската економија. Иако трговските податоци не ја одразуваат целосно важноста на овие производи за американските потрошувачи, коавторката на студијата, Самина Султан, предупредува дека зголемувањето на царините може да има негативни последици за самите Американци.
