Портпаролката на СДСМ, Богданка Кузеска, на последната прес-конференција изрази загриженост за економската ситуација во Македонија, посочувајќи на континуираниот раст на цените и стагнацијата на платите. Според неа, изјавите на премиерот Христијан Мицкоски дека „платите растат по 11, 12, 13 проценти на месечно ниво“ се само обична манипулација и потценување на интелигенцијата на граѓаните. “Сака да им каже дека тие не знаат дека во изминатите 6 месеци платите ‘божем’ им пораснале за 66% или 110% за последните десет месеци? Вакви фантазии не постојат во македонската економија,” рече Кузеска.
Таа истакна дека реалноста е сосема поинаква. За само четири месеци, вредноста на синдикалната потрошувачка кошница пораснала за 3.473 денари, што значи дека за покривање на трошоците на едно семејство потребни се речиси 2,7 минимални плати. “Ниту просечната нето-плата не го следи растот на цените, во истиот период порасна за само 1.033 денари,” додаде таа.
Кузеска истакна дека минималната плата во Македонија е на дното во Европа и на Балканот, со примери од соседните земји каде минималната плата е значително повисока. “Во БиХ минималната плата веќе е 511 евра, во Србија 500 евра, а во Црна Гора 600 и 800 евра. А владата на Мицкоски не дозволува минималната плата да се зголеми на 500 евра,” објасни таа.
Според најновите податоци, БДП по глава на жител изнесува само 8.751 долар, што е далеку под европскиот просек. “Тоа е доказ за катастрофалната економска состојба. Македонија е четврта во Европа, но одзади, на листата на најсиромашни земји,” заклучи Кузеска.
Таа повика на итно зголемување на платите и прифаќање на предлозите на СДСМ за минимална плата од 500 евра, нагласувајќи дека “трошоците секојдневно одат нагоре, а приходите не го следат тој раст. Македонија тоне во сиромаштија.”
