Автомобилите од кинеско производство, кои до неодамна често беа доживувани како егзотика или со скепса од западните купувачи, денес имаат сè посилно присуство на пазарот во Обединетото Кралство. Според најновите проценки, до крајот на 2025 година кинеските марки ќе учествуваат со околу 10 проценти од вкупната продажба на нови автомобили во Велика Британија.
Податоците, објавени во извештај на The Guardian и базирани на анализи на европскиот експерт за електрични возила Матијас Шмит, покажуваат дека кинеските производители ќе продадат повеќе од 200.000 нови возила во текот на 2025 година на британскиот пазар.
Најголем дел од овој успех го носат три брендови – MG, BYD и Chery. MG и натаму е убедливо водечки кинески бренд во Велика Британија, со над 70.000 продадени возила во 2025 година, што е слично на резултатите од претходната година.
Особено впечатлив раст бележи BYD, кој за само една година ја зголеми продажбата од помалку од 9.000 возила во 2024 на повеќе од 40.000 во 2025 година. Со тоа, кинеските автомобили веќе не се реткост на британските патишта, туку стануваат редовна појава.
И други кинески марки забележаа значителен напредок. Jaecoo продал над 20.000 возила, додека Omoda се приближи до таа бројка. Chery, Polestar и Leapmotor исто така бележат стабилен интерес кај купувачите, иако со нешто поскромни обеми на продажба.
Паралелно со растот на кинеските производители, јапонските автомобилски брендови забележаа пад на пазарниот удел во Велика Британија, кој во изминатата година се намалил за речиси еден процентен поен. Иако станува збор за умерен пад, аналитичарите посочуваат дека трендот е јасен и дека се забележува и на други европски пазари.
Експертите оценуваат дека конкурентните цени, брзото воведување на електрични модели и агресивната пазарна стратегија се клучните фактори зад растечкиот успех на кинеските производители во Европа.
