По поднесената кривична пријава од страна на Министерството за внатрешни работи, јавниот обвинител од Специјализираното одделение за гонење на кривични дела поврзани со полициски службеници и затворската полиција започна истражна постапка против 15 осомничени лица. Тие се обвинети за сериозни кривични дела, вклучувајќи злосторничко здружување и пустошење на шуми, а некои од нив се соочуваат и со обвиненија за злоупотреба на службена положба и овластувања.
Во текот на 2025 година, двајца вработени во осомниченото правно лице, заедно со полициски службеник, формирале група со цел да стекнат противправна имотна корист преку злоупотреба на службената положба, давање и примање поткуп, како и пустошење на шумите. Оваа група, во соработка со други осомничени, вклучувајќи вработени во различни институции, спровела нелегални активности кои резултирале со опустошување на шума на површина од 6.000 хектари, сопственост на ЈП Национални Шуми ПСШ Малешево.
Како последица на нивните дејства, била исечена дрвна маса во количина од 1.500.000 метри кубни, што се проценува на 6.405.000.000 денари. Организаторите на оваа криминална мрежа спровеле нелегална сеча, а потоа ја транспортирале и продавале како легално исечена, со цел да остварат противправна имотна корист. Додатно, полициски службеници не само што не презеле мерки против нив, туку и ги информирале за полициските патроли, што им овозможило да продолжат со своето криминално дејствување.
Директорот на ЈП Национални шуми – ПО Малешево, исто така, бил вмешан во оваа операција, одобрувајќи нелегалната сеча, додека началникот на ОВР Делчево ги прикривал сторителите и средствата користени за извршување на кривичните дела. Првосомничениот, во име на осомниченото правно лице, му дал паричен подарок на директорот на ЈП Национални шуми во износ од 6100 евра, со цел да добие дозвола за нелегална сеча на дрвна маса.
Во текот на вчерашниот ден, за да не бидат откриени сторителите, осомничениот началник известил член на групата за полициските активности, по што организаторот ги информирал лицата кои извршувале нелегална сеча да го „чистат“ теренот. Овој осомничен бил фатен на лице место. Јавниот обвинител, оценувајќи дека постојат основи за притвор, достави предлог до судијата на претходна постапка за определување на мерка притвор за сите осомничени.
