Од рано утрово, Грчка полиција спроведува обемна акција во повеќе делови на земјата за разбивање криминална организација осомничена дека измамувала граѓани на бензински пумпи со инсталирање нелегален софтвер што прикажувал поголема количина гориво од реално наточената.
Акцијата опфаќа над 30 истовремени истраги на бензински пумпи, во компании и приватни домови, а досега се уапсени десет лица, соопштија од полицијата. Операцијата ја спроведува Дирекцијата за борба против организиран криминал.
Полициските активности се одвиваат во областа Атика и поширокиот регион на Атина, како и во Солун, Тесалија, централна, северна и североисточна Грција.
Според информациите од полицијата, членовите на криминалната мрежа на бензинските пумпи инсталирале специјален нелегален софтвер, со кој при точење се прикажувала поголема количина гориво, додека во реалноста се испорачувала помала, со што директно ги оштетувале потрошувачите.
Од грчките власти потсетуваат дека вакви криминални шеми биле откривани и во текот на минатата година. Во март беа уапсени повеќе од 55 лица, членови на две организирани групи, при што беше утврдено дека софтверот бил инсталиран на над 50 бензински пумпи низ цела Грција. Два месеци подоцна, како резултат на истрагите, беа затворени пет бензински пумпи во Солун и Атина.
Акцијата продолжува, а од полицијата најавуваат дополнителни апсења и кривични постапки, со цел целосно расчистување на случајот и спречување на понатамошни злоупотреби.
