Во истарското место Каштелиr вчера избувна вистинска драма откако 39-годишен државјанин на Косово го поставил албанското знаме на врвот од градежна дигалка, предизвикувајќи незадоволство и реакции од локалното население. Полицијата веднаш интервенирала, а против работникот е поведена прекршочна постапка поради нарушување на јавниот ред и мир, соопштија од истарската полиција.
Инцидентот се случил околу 10:35 часот. Според полицијата, мажот со поставување на знамето го прекршил член 26 од Законот за прекршоци против јавниот ред и мир, кој забранува истакнување знаме на друга држава без официјално одобрение или јавен повик од надлежна институција.
Неофицијално, знамето било поставено поради раѓањето дете на еден од работниците. Но, дел од мештаните тврдат дека вакви случаи се повторуваат и дека ги доживуваат како провокација, па веднаш го пријавиле настанот во Општината, пишува Јутарњи лист.
Дополнителна симболика добива фактот што инцидентот се случил токму на денот кога Албанија го слави својот Ден на знамето и Денот на независноста, што дополнително ги разгневило жителите.
Настанот предизвика бројни реакции во јавноста, а полицијата продолжува да го истражува случајот.
