Русија започна изградба на нова фабрика за експлозив во Сибир, со цел значително да ја зголеми продукцијата на моќни експлозиви кои се користат во артилериската муниција – што може сериозно да влијае на воената рамнотежа во војната со Украина. Ова го покажува анализа на државни документи и сателитски снимки спроведена од агенцијата Reuters.
Новата производна линија се гради во рамки на државниот одбранбен комплекс „Свердлов“ и е сместена во фабриката „BOZ“ (Bijsk Oleum Plant), недалеку од градот Бијск, на околу 3.000 километри источно од Москва. Според извори блиски до проектот, целта е производство на RDX, високобрзински експлозив со силен деструктивен ефект, а можно е и производство на сличниот HMX.
Според документите, годишниот капацитет на новата фабрика е предвиден да достигне 6.000 метрички тони експлозив, што би било доволно за полнење на околу 1,28 милиони артилериски гранати OF-29 со калибар од 152 мм. Овој капацитет би значел сериозно зголемување на руската огнена моќ.
Во 2024 година, Русија произведе околу 2 милиони гранати со калибар 122 и 152 мм, но увезе и 2,7 милиони од Северна Кореја, според украинската воена разузнавачка служба (ГУР). Сепак, дел од тие гранати биле со слаб квалитет, потврдуваат воени аналитичари.
Стручњаците предупредуваат дека новата фабрика може да има стратешко значење, особено во период кога Украина и Западот настојуваат да ја зголемат сопствената продукција на муниција за да го забават рускиот напредок.
Иако руското Министерство за одбрана, Кремљ и „Свердлов“ одбиваат да коментираат, сателитските снимки потврдуваат изградба на нови објекти и инфраструктура. Фабриката, поради својата географска оддалеченост, е и надвор од дострелот на поголемиот дел од украинските дронови.
Според Томас Клапетке, експерт за експлозиви од Универзитетот „Лудвиг Максимилијан“ во Минхен, „ова е огромен капацитет кој ќе има значајно влијание врз руските одбранбени способности“.
