Со околу 9.000 американски долари бруто домашен производ (БДП) по глава на жител, Македонија се соочува со долг пат доколку сака стандардот на своите граѓани да го доближи до просекот на Европската Унија. Според податоците, македонските граѓани се за околу 15.000 долари посиромашни од најсиромашните земји-членки на ЕУ, како Бугарија, а разликата во однос на просекот на Унијата — кој изнесува околу 36.000 до 37.000 долари — достигнува дури 26 до 27 илјади долари.
Според анализите на Светската банка, доколку Македонија сака значително да го зголеми богатството на населението, ќе мора да постигне извонредно високи стапки на економски раст.
„Сè зависи од стапката на раст. Доколку таа е многу висока, на пример 10 проценти годишно, БДП може да се удвои за само седум години. Така, од сегашните 8-9 илјади долари, може да се достигне 17 илјади. До 10.000 долари може да се стигне и многу побрзо — сè зависи од интензитетот на растот,“ објаснува Иваило Изворски од Светската банка.
Според него, за да се достигне просекот на ЕУ од околу 36.000 долари по глава на жител, ќе бидат потребни меѓу 40 и 70 години — зависно од тоа дали економскиот раст ќе биде висок или низок.
Од друга страна, македонскиот премиер Христијан Мицкоски најави дека до крајот на мандатот на актуелната влада, односно до средината на 2028 година, македонската економија ќе достигне вкупен БДП од 20 милијарди долари, што би значело над 10.000 долари по глава на жител.
