Американскиот производител на електрични автомобили „Тесла“ повлече повеќе од 46.000 свои возила од моделот „Сајбертрак“ поради проблем со каросеријата што може да ја загрози безбедноста, соопшти денеска Националната управа за безбедност во сообраќајот на патиштата на САД (NHTSA).
Како што се наведува, постои ризик горниот дел од каросеријата на „Сајбертрак“ да се оддели за време на возење, пренесува Си-Ен-Ен.
Станува збор за возила произведени од ноември 2023 година до 27 февруари оваа година, што опфаќа речиси сите досега произведени модели на „Сајбертрак“.
Ова е само уште една од серијата лоши вести за „Тесла“. Акциите на компанијата се во постојан пад откако извршниот директор Илон Маск отпатува во Вашингтон и се посвети на работа во Одделението за ефикасност на владата (DOGE).
Вредноста на „Тесла“ акциите достигна врв од 479,96 долари по акција на 17 декември, но од тогаш изгубија повеќе од 50 проценти од вредноста, што резултираше со намалување на пазарната капитализација на компанијата за над 800 милијарди долари.
