Кандидатот за градоначалник на Скопје од коалицијата „Искуство за успех“, Александар Трајановски, објави амбициозен план за решавање на проблемите со паркирањето и подобрување на условите за старите лица во градот. Според неговите најави, нови катни гаражи ќе се изградат во близина на Зоолошката градина и во Дебар Маало, а паралелно со тоа, ќе се реализира и проект за современи пензионерски домови.
„Време е да ставиме ред и хармонија таму каде што со години владее хаос. Со новите катни гаражи конечно ќе се ослободи јавниот простор и ќе се реши паркирањето во една од најоптоварените зони во градот,“ изјави Трајановски. Планирано е изградба на две катни гаражи со по две подземни нивоа, опремени со современ систем за управување со паркирањето, полначи за електрични возила и зелен покрив.
Во рамките на овој проект, ќе биде изграден и современ пензионерски дом, кој е дел од петте нови домови предвидени во програмата на Трајановски. „Овие домови нема да бидат недостижни луксузни објекти, туку достапни, човечки и прифатливи за секој што има потреба од грижа. Градот Скопје ќе обезбеди субвенции за сместување, за граѓаните да не мора да плаќаат баснословни суми за достоинствена старост,“ истакна Трајановски.
Програмата предвидува изградба на пет нови пензионерски домови, кои ќе располагаат со вкупно 300 нови апартмански капацитети за сместување на стари и изнемоштени лица. Овие домови ќе бидат опремени со современи стандарди, вклучувајќи медицинска грижа, дневни центри, паркови и простори за социјализација.
Дополнително, Трајановски најави и субвенции за младите семејства, со цел да им се олесни грижата за постарите членови на семејството и да се поттикне солидарноста меѓу генерациите. „Скопје мора да биде град што се грижи за младите, за старите, за сите. Нашата визија е град кој гради решенија, не проблеми – град што им помага на луѓето да живеат достоинствено и спокојно,“ порача Трајановски.
