Вашингтон, 22 јануари 2025 (МИА) – Доналд Трамп денеска ја нарече бискупката од Вашингтон, Мериен Едгард Бади, „одвратна“ и побара да се извини откако таа му кажа на американскиот претседател дека сее страв меѓу имигрантите и ЛГБТК луѓето.
-Таканаречената бискупка која зборуваше на националната миса вчера наутро е радикална левичарка која го мрази Трамп, напиша американскиот претседател на својата платформа Truth Social.
„Таа го внесе светот на политиката во нејзината црква на многу нељубезен начин. Таа говореше со одвратен тон, беше неубедлива и неинтелигентна, напиша Трамп откако присуствуваше на богослужбата во националната катедрала во Вашингтон, предводена од бискупката Мериен Едгард Бади.
Во понеделникот, откако по вторпат положи претседателска заклетва, Трамп потпиша извршни наредби за суспендирање на пристигнувањето на барателите на азил и протерување на илегалните мигранти од земјата. Тој, исто така, донесе одлука да се признаат само два рода – машки и женски.
Бади му се обрати на Трамп со зборовите: „Те молам, имај милост. Господине Претседател, за оние во нашите заедници чии деца се плашат дека нивните родители ќе бидат одземени од нив, како и да им помогнеме на оние кои бегаат од воените зони и прогонството во нивните земји да најдат сочувство и добредојде овде. Нашиот Бог не учи дека треба да бидеме милосрдни кон странецот“, рече бискупката. „Има геј, лезбејки и трансродови деца во демократски, републикански и независни семејства, некои се плашат за своите животи“, продолжи таа.
Трамп подоцна во објавата на Truth Social напиша: „Покрај нејзините несоодветни изјави, масата беше многу досадна и неинспиративна. Таа не е многу добра во својата работа! Таа и нејзината црква ѝ должат на јавноста извинување!“, напиша Трамп.
Од Марија Спасовска /МИА
