Скопје, 27 септември 2024 (МИА) – Турски бизнисмени се заинтересирани за инвестирање во Северна Македонија. Економската соработка меѓу двете земји е добра, но капацитетот не е доволно искористен. Мора да се работи на поврзување меѓу малите и средните фирми во речиси сите сектори, порачаа учесниците на денешниот Македонско – турски инвестициски и трговски форум што се одржува на Меѓународниот балкански универзитет во Скопје.
Како што беше истакнато, вкупните турски инвестиции во Република Северна Македонија изнесуваат околу две милијарди евра. Турските инвеститори сочинуваат 38 отсто од вкупните странски инвестиции во земјава. Турција е наш петти партнер според инвестициите и седми во однос на трговијата.
-Нашата стратегија е да постигнеме подобар економски развој не само на Република Северна Македонија, туку и на целиот регион. Токму затоа е иницирана и оваа наша заедничка средба која треба да ги отвори можностите за градење на стабилни деловни односи и да обезбеди посилен и просперитетен развој меѓу РС Македонија, Република Туркије и регионот. Со добар план и програма очекуваме да ги искористиме сите потенцијали на нашите земји и заеднички да постигнеме зголемени инвестиции, зголемена трговска размена и поголем економски раст меѓу РС Македонија, Република Туркије и регионот, рече Имер Селмани од МАТТО.
Според Аркан Керим од Сојузот на стопански комори на Македонија, Турција е одлична можност и голем потенцијал за пласман на македонските производи.
-Треба да го смениме начинот на соработка. Турските компании кога доаѓаат тука не се среќаваат со тие што треба, туку само со една институција, МАТТО. Но, тоа не е доволно зашто имаме голем потенцијал, мали и средни претријатија од труско говорно подрачје, посебно од Гостиварско, Дебар, Тетово, Скопје,… кои може да направат одлична соработка со партнери фирми од Турција. Ние треба нив да ги споиме. На малите и средните фирми им треба сигурен пласман, им треба некој што ќе инвестира во нивните погони или некој со кој ќе направат заеднички пласман на трети пазари, објасни Керим.
Соработката, беше напоменато на форумот, оди во нагорна линија. Има честа соработка меѓу македонските и турските фирми не само во рамки во регионалните иницијативи, туку и во европските, па и во Светската стопанска комора.
-Соработуваме во многу сектори, текстилот, прехранбената и металната индустрија, туризмот,… Има голем потенцијал, но не е доволно искористен. Ние ги знаеме само туристичките точки или Истанбул како врата на Турција, но оваа земја има многу голема понуда и огромни стопански можности. Турција се граничи со земји како Иран, Ирак, треба да размислиме дали преку одредени контакти што ги имаме во Турција можеме заеднички да настапиме и во тие земји, подвлече претседателот на ССК, Трајан Ангеловски.
На форумот учествуваат околу 35 турски мали и средни фирми, а освен стопанственици, присуствуваат и политички претставници од двете земји.
Од Мирјана Чакарова/МИА
