Полициски службеници од СВР Струмица вчера напладне ја лишиле од слобода Ј.Т. (53) од Струмица, под сомнение дека сторила кривично дело лихварство.
Според информациите од полицијата, случајот се однесува на настан од јуни минатата година, кога таа на жител на струмичко село му позајмила 2.700 евра, по што од него побарала да врати несразмерно поголем износ – дури 15.000 евра.
Оштетениот вчера остварил средба со осомничената за да ѝ исплати 100 евра, сума која таа ја определила како месечна камата за долгот. Во моментот кога ѝ ја предал претходно обележаната банкнота, полициските службеници ја привеле на лице место.
При личниот преглед кај неа биле пронајдени обележаните 100 евра, како и тетратка и повеќе листови хартија на кои водела евиденција за дадените заеми и каматите што требало да ѝ бидат исплатени.
По наредба на судија на претходна постапка, извршен е и претрес во нејзиниот дом, при што биле пронајдени и одземени пари во денари и евра, нотарски акти и дополнителна документација со податоци за лица на кои им давала заеми со високи камати. Според првичните сознанија, таа во повеќе наврати давала пари и наплатувала несразмерно високи износи, со што се стекнувала со противправна имотна корист.
Ј.Т. е задржана во полициската станица во Струмица, а за случајот е известен јавен обвинител. По целосното документирање на настанот, против неа ќе биде поднесена кривична пријава за лихварство по член 260 од Кривичниот законик.
