Во рамките на дополнителната програма на фестивалот „Охридско лето“ вечерва ќе бидат прикажани унгарските филмови „Три илјади изброени парчиња“ и „Без здив“. Проекциите ќе се одржат во Центарот за култура „Григор Прличев“ со почеток во 20 часот, како дел од Унгарската вечер.
Филмот „Три илјади изброени парчиња“ (режија Адам Шази) го прикажува искуството на пет млади Роми актери кои се соочуваат со расизам и искористување во театарска претстава режирана од белец. Филмот поставува прашања за системскиот расизам и улогата на белите интелектуалци во репрезентацијата на Ромите.
„Без здив“ (режија Каталин Молдовај) раскажува приказна за наставничка во мал унгарски град која е обвинета за „ширење хомосексуална пропаганда“ поради образовна задача со која предизвикува бурни реакции во конзервативната заедница. Филмот се осврнува на теми како образование, притисок од режимот и ограничување на слободата на изразување.
