Белград, 4 април 2025 (МИА) – Српскиот претседател Александар Вучиќ за време на посетата на Софија ја истакна важноста на Бугарија како соседна земја и ја покани Бугарија да учествува на изложбата Експо 2027 што ќе се одржи во Белград.
Како што пренесуваат бугарските медиуми, Вучиќ ја опиша Бугарија како клучен партнер за Србија и рече дека нејзиното учество на меѓународната изложба ќе биде од големо значење.
Вучиќ рече дека во Софија, каде што учествува на состанокот на шефови на држави и влади во рамките на процесот Акаба посветен на Балканот, веќе имал отворени разговори со лидерите на повеќе земји од регионот, меѓу кои Словенија, Хрватска и Црна Гора.
Зборувајќи за пошироките регионални прашања, Вучиќ ја истакна сложената безбедносна средина на Балканот. Тој предупреди дека сегашниот период е еден од најтешките во последните неколку децении, велејќи дека секој збор што се зборува сега може да има значителни последици.
Поради тоа, наведе тој, Србија ја зајакнува соработката со Унгарија како одговор на новите предизвици, нагласувајќи дека таквиот пристап не е конфронтациски, туку е насочен кон изнаоѓање суштински решенија.
Претседателот на Србија ситуацијата во и околу Република Српска ја оцени како исклучително сериозна, нарекувајќи ја голем предизвик за Србија. Тој откри дека во неговата делегација во Софија е и шефот на Воено-разузнавачката агенција на Србија, што дополнително ја нагласува важноста што неговата влада ја придава на проценката на регионалните закани и зачувувањето на националната безбедност.
Вучиќ повтори дека приоритет на Србија е да ги зачува мирот и стабилноста за сите нејзини граѓани, и покрај предизвиците што ги носи напнатата и брзо менувачка геополитичка ситуација.
Од Марија Спасовска Извор МИА
