Претседателот на Србија, Александар Вучиќ, денеска изјави дека изборите ќе бидат распишани пред законскиот рок, но потенцираше дека не планира да го менува Уставот за да може повторно да се кандидира за претседател.
„Дали ќе помогнам на некого и ќе се залагам за оние кои мислам дека можат успешно да ја водат Србија во иднина, сигурно ќе го сторам тоа, но од која позиција тоа не е тема сега“, рече Вучиќ на заедничка прес-конференција со австрискиот канцелар Кристијан Штокер во Белград.
Тој додаде дека изборите ќе се одржат во согласност со Уставот и законите, најверојатно пред законскиот рок, а резултатот ќе ја покаже волјата на народот.
Во однос на неодамнешните протести, Вучиќ ги оцени како многу насилни и посочи дека демонстрантите одат по домовите на политичките противници, што спореди со слични случаи во Австрија и Германија. Тој истакна дека Србија успеала да ја задржи демократската атмосфера без сериозна употреба на сила.
Претседателот, исто така, го критикуваше известувањето на австриските медиуми, потенцирајќи дека во нив не било презентирано различно мислење за протестите во Србија.
