Агенцијата за храна и ветеринарство (АХВ) има издадено две активни забрани за увоз на храна, откако се појавија сериозни здравствени ризици во земји од регионот и пошироко. Забранет е увоз на бразилско пилешко месо поради откриен случај на птичи грип, како и месо од мали преживари од Албанија, поради појава на чума кај кози во областа Мал Дебар – конкретно, во местото Кастриот, каде што на фарма со 200 кози беше откриено ново жариште на болеста.
Директорот на АХВ, Оливер Миланов, ги уверува граѓаните дека „македонските потрошувачи јадат генерално безбедна храна“, и посочи дека во последниве шест месеци над 56 тони храна биле уништени поради класификација како небезбедни. Причините биле разновидни: бактерии во минерална вода, нејодирана сол, и зголемено присуство на пестициди во овошје и зеленчук.
Овие информации беа објавени на трибина за јавна свест за безбедноста на храната, организирана од АХВ и Европската агенција за безбедност на храна (EFSA). Се разговараше за значењето на EFSA во системот на ЕУ, ИПА-интеграцијата, но и за исхраната, нутритивните потреби и здравствените тврдења.
Во контекст на сè почести закани од зарази и контаминирана храна, ваквите мерки се од клучно значење за заштита на јавното здравје.
