Од 1 јануари граѓаните ќе плаќаат повисока партиципација за здравствени услуги, најави директорот на Фондот за здравствено осигурување (ФЗО), Сашо Клековски. Иако зголемувањето го оцени како „симболично“, бројките покажуваат дека кај одредени услуги поскапувањето изнесува и до 50 отсто, а кај некои пак и повеќекратно.
Така, услугата за која досега се плаќаа 40 денари, од Нова година ќе чини 60 денари. Специјалистички преглед со земање брис, кој досега здравствената установа ја чинел 400 денари, сега ќе се наплаќа 750 денари. Општиот ургентен пакет од 780 денари поскапува на 2.450 денари, додека ехо-преглед на еден орган од 300 денари ќе се зголеми на 670 денари.
Клековски објасни дека одлуката се носи по повеќе од десет години без промена на цените и се однесува на основниот специјалистички и интернистички пакет.
„Специјалистичкиот преглед според ценовникот на Фондот досега беше 380 денари – цена стара повеќе од една деценија. Сега се зголемува на 720 денари. Нето-ефектот од оваа одлука ќе биде околу една милијарда денари годишно за здравствените установи, од кои 80 проценти во јавниот и 20 проценти во приватниот сектор“, изјави Клековски.
Интернистичкиот пакет, како што додаде, ќе донесе дополнителни околу 340 милиони денари годишно.
Според директорот на ФЗО, не станува збор за „нови пари“, туку за подобра валоризација на веќе извршената работа. Здравствените установи, како што рече, често не успевале да го реализираат својот буџет бидејќи цените на услугите биле прениски.
„Установите фактурираат услуги кон Фондот, но најчесто се под 80 отсто реализација. Поплаките беа дека со вакви цени не можат да го исполнат буџетот. Со зголемувањето на цените, се овозможува подобро вреднување на нивната работа“, истакна Клековски.
Сепак, најавеното поскапување доаѓа во период кога граѓаните веќе се соочуваат со повисоки трошоци за живот. Иако премиерот во изминатиот период тврдеше дека зголемувањето на платите би можело да предизвика инфлација, во пракса поскапеа низа услуги поврзани со државата – струјата, парното, храната, а се најавува и поскапување на градинките.
Во такви услови, одењето на ургентен преглед со новите цени, за дел од граѓаните би можело да стане финансиски товар, па дури и луксуз.
