Во Домот на војската во Белград синоќа се одржа традиционалната 22-ра Македонска вечер, организирана од Македонското здружение „Кочо Рацин“. Настанот, кој веќе повеќе од две децении ја негува македонската култура меѓу нашата дијаспора во Србија, повторно собра голем број посетители.
За атмосферата се погрижи „Фантастик бенд“ од Македонија, чија изведба на изворни македонски песни и ора предизвика одлично расположение во преполнетата сала. Гостите уживаа во музичкиот репертоар, кој ја долови автентичната македонска традиција и дух.
Присутните ги поздравија претседателката на здружението „Кочо Рацин“, Лидија Демниева, директорот на Македонскиот културно-информативен центар во Белград, Васко Шутаров, како и претседателот на Светскиот Македонски Конгрес, Тодор Петров.
Демниева во своето обраќање истакна дека Македонската вечер е значаен настан што ги поврзува Македонците во Србија и ја одржува живата врска со татковината. Таа нагласи дека здружението ќе продолжи да ги одбележува важните датуми и личности од македонската историја, како и да го афирмира македонскиот идентитет, јазик, култура и наследство.
Шутаров, пак, се заблагодари за големата посетеност и потврди дека Македонската народна музика е силен симбол на идентитетот кој ги обединува Македонците ширум светот. Тој ги поттикна присутните да продолжат да ја негуваат традицијата и да учествуваат во активностите на МКИЦ.
Настанот помина во весела и емоционална атмосфера, со многу песни, ора и споделени моменти, уште еднаш потврдувајќи ја силната врска на македонската заедница со своето културно наследство.
