Владата на Албанија јавно соопшти дека ја одбива можноста да прифати азиланти кои Велика Британија сака да ги испрати како дел од нејзината контроверзна имиграциска политика.
Одлуката уследи по неколку месеци шпекулации дека Лондон и Тирана преговараат за потенцијален договор сличен на оној што Обединетото Кралство го потпиша со Руанда — план кој предвидува испраќање на илегални мигранти и баратели на азил во трети земји за обработка на нивните барања.
Британските медиуми соопштуваат дека Еди Рама го одбил Стармер наведувајќи дека Албанија веќе потпишала договор со Италија и нема простор за да прифати и од Велика Британија.
Велика Британија, која се соочува со зголемен број нелегални преминувања преку Ла Манш, ги интензивира напорите за договори со други земји за надворешна обработка на азилантски случаи. Иако официјални лица во Лондон не го потврдија директно интересот за Албанија како потенцијален партнер, извори од британските медиуми тврдеа дека разговори во изминатите месеци биле водени на дипломатско ниво.
Албанската јавност силно реагираше на идејата, особено поради фактот што многу албански државјани сами мигрираат кон Велика Британија и други западни земји во потрага по подобри услови за живот. Граѓански организации и активисти за човекови права предупредија дека прифаќањето на таков договор би било „неетичко и штетно по имиџот на Албанија како демократска земја“.
Од британска страна, Министерството за внатрешни работи изјави дека ќе продолжи да бара „иновативни и хумани решенија“ за справување со проблемот на илегална миграција, но не ја коментираше одлуката на Албанија.
Одбивањето на Тирана е удар за политиката на британската влада, која се надеваше дека ќе најде дополнителни партнери покрај Руанда за реализација на своите имиграциски цели.
Во меѓувреме, аналитичарите сметаат дека Албанија со оваа одлука сака да испрати јасна порака дека не сака да стане “прифатен центар” за туѓи проблеми, особено кога станува збор за сложени и често кршливи прашања како што се азилот и миграцијата.
Ројтерс на 15 мај годинава објави статија во која цитира високи лица од Владата на Велика Британија кои велат дека земјата ќе продолжи да бара земји-домаќини кои ќе ги прифатат мигрантите.
