Вашингтон, 7 август 2024 (МИА) – Американскиот претседател Џо Бајден синоќа разговараше со лидерите на Катар и Египет за прашањето за деескалација на тензиите во регионот, како и за прекин на огнот во Појасот Газа и договор за ослободување на израелските заложници држени од радикалната палестинска група Хамас.
Во меѓувреме, египетското претседателство соопшти дека за време на телефонскиот разговор со Бајден, египетскиот претседател Абдел Фатах ал Сиси го потврдил гледиштето на Каиро во врска со „опасноста од последиците од продолжувањето на војната во Газа и нејзиното негативно влијание врз стабилноста во регионот.” . Според нив, склучувањето на примирје меѓу Израел и Хамас е основа за враќање на мирот и стабилноста во регионот.
Бајден и Сиси се согласија да продолжат да работат за прекин на огнот и спроведување на решение за израелско-палестинскиот конфликт преку соживот на две држави, се додава во соопштението од кабинетот на Сиси.
Египет, Катар и САД продолжуваат да дејствуваат како посредници меѓу Израел и Хамас за ставање крај на војната во Газа.
Од Златко Шумковски Извор МИА
