По шест години судска постапка, трагичната несреќа кај селото Ласкарци, во која животот го загубија 16 лица, а 38 беа повредени, конечно доби правосилен судски епилог. Апелациониот суд денеска ја објави пресудата со која ја прифати жалбата на Јавното обвинителство и им изрече повисоки казни на дел од обвинетите.
Сопственикот на транспортната компанија „Дурмо Турс“, кој е и првообвинет во случајот, доби зголемена затворска казна од 4 на 10 години. Идентична казна доби и второобвинетиот Ремзи Мифтари, чија првостепена казна беше 6 години затвор. Третообвинетиот Игор Ѓорѓиевски, раководител на техничкиот центар „АМЗ Гостивар“, и четвртообвинетиот Горан Дуковски, контролор, добија зголемени казни од 5 на 7 години затвор.
Обвинителството не побара измени за петтиот и шестиот обвинет – техничкиот контролор Јане Бабаровски останува со 5 години затвор, додека возачот на автобусот останува осуден на 14 години затвор, што беше највисоката казна во случајот.
Пресудата е правосилна и обвинетите треба да бидат префрлени во затвор за издржување на казните. Сепак, тие имаат право да поднесат барање за вонреден правен лек пред Врховниот суд.
Според судскиот наод, автобусот кој се преврте на 13 февруари 2019 година бил технички неисправен. Обвинетите не ги испочитувале законските обврски за безбедност, а сопирачките не ги задоволувале ни минималните стандарди. Утврдено е и дека во возилото бил вграден манипулативен тахограф со цел да се прикрие вистинската брзина. Возачот ја предизвикал несреќата поради преголема брзина и небрежност.
Во текот на јавната расправа, сите обвинети се изјаснија дека не се чувствуваат виновни и бараа случајот да се врати на почеток, тврдејќи дека има суштински повреди во постапката и погрешно утврдени факти. Сепак, Апелациониот суд го отфрли нивното барање.
Несреќата кај Ласкарци останува една од најголемите трагедии во поновата историја на Македонија. Освен болката и загубата, семејствата на жртвите со години го носеа товарот на бавната правда. „Го загубив брат ми Зоран. Оваа пресуда значи нешто, но ништо не може да го врати,“ изјави Горан Давидовски, брат на еден од настраданите, кој со години беше активен во барањето правда.
