Вашингтон, 1 август 2024 (МИА) Претседателот на САД Џо Бајден даде изјава денеска по повод ослободувањето од руските затвор на Пол Вилан, Еван Гершкович, Алсу Курмашева и Владимир Кара-Мурза.
-Тројца американски државјани и еден носител на постојано жителство во САД, кои беа неправедно затворени во Русија, Денеска конечно се враќаат дома, истакна претседателот именувајќи ги тројцата.
-Договорот со што се овозможи нивното ослободување претставуваше дипломатски пробив, потенцираше шефот на Белата куќа.
-Преговаравме за ослободување од Русија на вкупно 16 лица, вклучувајќи пет граѓани на Германија и седум граѓани на Русија, политички затвореници во нивната сопствена земја. Некои од овие жени и мажи беа неправедно задржани со години. Сите тие претрпеа незамисливи страдања и неизвесност. Денес нивните страдања завршуваат.
Бајден изрази благодарност до сојузниците на САД кои, како што истакна, „беа со нас за време на тешките и сложени преговори за постигнување на овој резултат, вклучувајќи ги Германија, Полска, Словенија, Норвешка и Турција. Ова е јасен пример зошто е толку важно во овој свет да имате пријатели на кои можете да им верувате и на кои можете да се потпрете. Нашите сојузи ја прават положбата на Американците побезбедна.“
„Дозволете ми да се изразам јасно: нема да запрам во моите напори додека сите незаконски задржани Американеци, или тие задржани како заложници каде било во светот, не се вратат кај своите најблиски, потенцираше претседателот.
Тој изјави дека неговата администрација досега вратила дома 70 Американци, многумина од кои биле во затвор пред тој да биде избран за претседател.
Од Борис Камчев/МИА
